Əslən Azərbaycandan olan rusiyalı iş adamı, milyarder Fərhad Əhmədov, boşanma sonrası əmlak bölgüsü müqaviləsi çərçivəsində keçmiş həyat yoldaşına təxminən 207 milyon dollar ödəməyi qəbul edib.

Bu, sərvətinin təxminən yüzdə 15-i və İngiltərədəki məhkəmə tərəfindən 2017-ci ildə həyat yoldaşına verilən məbləğin yalnız üçdə biridir.

Bir neçə ildir keçmiş həyat yoldaşı Fərhad Əhmədovu məhkəməyə verib, Forbes jurnalinın 1,4 milyard dollar dəyərlkəndirdiyi əmlakının üçdən birini istəyirdi.

2016-cı ildə bir London məhkəməsi, milyarderin 453 milyon funt sterlinq (570 milyon dollar) ödəməsi ilə bağlı qərar çıxarıb. Financial Times qəzetinin qiymətləndirməsinə görə, bu boşanma zamanı verilən ən böyük məbləğlərdən biridir.

Əhmədov məhkəmənin qərarını yerinə yetirməkdən imtina edib. RBK-yə verdiyi müsahibədə milyarder məhkəmə qərarının onun üçün "tualet kağızından baha olmadığını" söyləib. Bundan sonra məhkəmə onun dünyadakı varidatına həbs qoyulmasını ilə bağlı qərar çıxarıb.

Bundan sonra, onun Dubay limanındakı 450 milyonluq "Luna" superyaxtasına həbs qoyulub.

Fobers jurnalinın məlumatına görə, Əhmədov bu məsələdə barışığa gəlsə də yaxtaa hüququnun bərpa olunması ilə bağlı razılığa gəlmək mümkün olmayıb.

Məhkəmədə udulan vəsaitin təxminən yarısı-103 milyon dollar onun keçmiş həyat yoldaşının vəkilinə çatıb.

Gürcüstanın keçmiş baş naziri İrakli Qaribaşvilinin, Dövlət Təhlükəsizlik Xidmətinin (DTX) keçmiş sədri Qriqol Liluaşvilinin və keçmiş baş prokuror Otar Partsxaladzenin evlərində axtarışlar aparılıb. Bu barədə ölkənin Baş Prokurorluğu məlumat yayıb.

Baş prokuror Georgi Qvarakidze brifinqdə bildirib ki, “müxtəlif elektron cihazlar, sənədlər və böyük miqdarda pul müsadirə olunub”. Axtarışlar oktyabrın 17-də səhər 10-dan başlayaraq ölkə üzrə 22 ünvanda eyni vaxtda aparılıb.

Qvarakidze jurnalistlərin suallarını cavablandırmayıb, istintaqın hansı maddələr üzrə aparıldığını açıqlamayıb.

"Exo Kavkaza" xəbər verir ki, vaxtaşırı keçmiş baş nazir və hakim “Gürcü Arzusu” partiyasının keçmiş lideri İrakli Qaribaşvilinin, həmçinin DTX-nın keçmiş rəhbəri Qriqol Liluaşvilinin korrupsiya işləri üzrə mümkün həbsi barədə şayiələr yayılırdı. “Gürcü Arzusu”nun bir sıra keçmiş tərəfdarları, o cümlədən keçmiş müdafiə naziri Cuanşer Burçuladze və onun qaynı, keçmiş iqtisadiyyat nazirinin müavini Romeo Mikautadze saxlanılıb.

Q.Liluaşvilinin adı mediada 4 oktyabr hadisələri ilə əlaqədar hallanıb. “Formula” televiziya kanalı mənbəsinə istinadla xəbər verib ki, o, ikiüzlü fəaliyyət göstərib, həm müxalifətlə əlaqədə olub, həm də hakimiyyətə məlumat ötürüb.

Baş nazir İrakli Kobaxidze daha öncə demişdi ki, “Gürcü Arzusu”nun bir keçmiş üzvü müxalifətlə əməkdaşlıq edib, amma adını çəkməyib.

Otar Partsxaladze 2013-cü ilin noyabr-dekabr aylarında Gürcüstanın baş prokuroru vəzifəsində çalışıb. 2023-cü ildə ABŞ ona qarşı sanksiyalar tətbiq edib, bunu “Rusiyanın Gürcüstandakı təsirinin gücləndirilməsi” ilə əsaslandırıb. Mətbuatın məlumatına görə, o, Moskvada yaşayır, Rusiya siyasi elitası ilə əlaqələrini qoruyur və “Gürcü Arzusu” hökuməti ilə sıx təmaslar saxlayır. Sanksiyalardan sonra Gürcüstan prezidenti Salome Zurabişvili onu vətəndaşlıqdan məhrum edib, bundan sonra o, soyadını Partxaladze-Romanova dəyişib. 2025-ci il mayın 9-da O.Partxaladze Moskvada Qırmızı Meydanda Qələbə Paradının qonaqları arasında görünüb. Ona qarşı Böyük Britaniya və Litvanın da sanksiyaları qüvvədədir.

Serbiya Daxili İşlər Nazirliyinin (DİN) Subotitsa şəhər bölməsinin əməkdaşları sərhədi qanunsuz keçmə, habelə insan qaçaqmalçılığında şübhəli bilinən 1983-cü il təvəllüdlü D.P. və Azərbaycandan olan 2002-ci il təvəllüdlü N.P.-ni saxlayıblar.

Yoxlama zamanı polis şübhəlilərin idarə etdiyi avtomobillərdə doqquz qanunsuz miqrant aşkarlayıb.

Ehtimal olunur ki, D.P. və N.P. miqrantları müəyyən ödəniş əvəzində Macarıstan sərhədinə çatdırmalı, sonra onlar qeyri-qanuni yolla oranı piyada keçməli idilər.

Subotitsa Baş Prokurorluğunun qərarı ilə şübhəlilər barədə 48 saatlıq həbs-qətimkan tədbiri seçilib.

Niderlandın Ali Məhkəməsi Moskvanın YUKOS neft şirkətinin keçmiş səhmdarlarına təxminən 50 milyard dollar ödənilməsi ilə bağlı kassasiya şikayətini rədd edib. Məhkəmənin mətbuat xidməti oktyabrın 17-də bu barədə açıqlama yayıb.

Rusiya Haaqadakı Arbitraj Məhkəməsinin qərarından Ali Məhkəməyə şikayət vermişdi. Bu məhkəmə 2014-cü ildə YUKOS-un səhmdarlarının xeyrinə qərar çıxarıb.

2014-cü ilin arbitraj qərarları– Rusiyanın "Hulley Enterprises Ltd.", "Veteran Petroleum Ltd." və "Yukos Universal Ltd." (HVY) şirkətlərinə 50 milyard dollar ödəmək öhdəliyi qüvvədə saxlanılıb.

Haaqadakı Arbitraj Məhkəməsi Moskvanın YUKOS-un iflasına səbəb olan hərəkətlərlə beynəlxalq öhdəliklərini pozması qərarına gəlib. Moskva isə bu qərarı mübahisələndirib. İş bir dəfə Niderland Ali Məhkəməsinə verilib, məhkəmə işi Amsterdam Apellyasiya Məhkəməsinə geri qaytarmışdı. 2024-cü ilin fevralında həmin məhkəmə yenidən keçmiş YUKOS səhmdarlarının xeyrinə qərar çıxarıb. İndi isə bu hökmü Ali Məhkəmə təsdiqləyib.

Əsas səhmdarları Mixail Xodorkovski və Leonid Nevzlin olan YUKOS 2000-ci illərin əvvəllərində Rusiyanın ən böyük neft şirkəti olub. 2006-cı ildə şirkət iflas edib, çünki onun əsas qurucusu Xodorkovski mənimsəmə və vergidən yayınma ilə bağlı cinayət işi üzrə təqsirləndirilib. İşadamı bu təqibləri siyasi motivli hesab edib. Şirkətin böyük hissəsi dövlət nəzarətində olan qurumlara keçib.

Prezident Donald Trampın keçmiş müşaviri Con Bolton məxfi informasiyanı paylaşmaqda ittiham olunur. Bu ittiham Boltona oktyabrın 16-da irəli sürülüb.

İttihamnamədə deyilir ki, Boltonun iki qohumu ilə paylaşdığı elektron mesajlarda onun hökumətin aparıcı rəsmiləri, xarici liderlər, kəşfiyyat brifinqlərindən yığdığı informasiya yer alıb. Keçmiş müşavirin qohumları ilə həmin materialın bir hissəsini kitabına salmağı müzakirə etdiyi bildirilir. İttihamnamədə adları çəkilməyən qohumları Bolton özünün redaktorları adlandırıb.

"Reuters" məsələdən agah iki nəfərə istinadla həmin qohumların Boltonun həyat yoldaşı və qızı olduğunu yazıb.

"Qanuni davranışımı qorumaq və onun (Trampın) səlahiyyətlərindən sui-istifadəsini ifşa etmək üçün mübarizəni səbirsizliklə gözləyirəm", - Bolton açıqlamasında deyib.

Vəkili isə bildirib ki, Bolton hər hansı informasiyanı qanunsuz paylaşmayıb, yaxud yığıb saxlamayıb.

Prezident Tramp Boltonun ittiham olunması ilə bağlı jurnalistlərin sualına "O, pis adamdır" cavabını verib.

Boltonla bağlı araşdırma Tramp administrasiyasından öncə, 2022-ci ildə başladılıb.

Merilend ştatında federal məhkəməyə təqdim olunan ittiham aktında Boltona qarşı milli müdafiə məlumatlarının ötürülməsi ilə bağlı səkkiz, bu məlumatların saxlanması ilə bağlı 10 maddə üzrə ittiham irəli sürülüb. Bu maddələrin hamısı Casusluq Aktının pozulması sayılır.

Hər bir maddə üzrə 10 ilədək həbs cəzası nəzərdə tutulur. Ancaq yekun cəzanı hakim müxtəlif amillərə əsaslanaraq müəyyən edir.

Trampın birinci prezidentlik müddətində onun milli təhlükəsizlik müşaviri olmuş Bolton sonradan prezidentin sərt tənqidçilərindən birinə çevrilib.

Jurnalist Nika Novak İrkutsk vilayətindəki 11 saylı Cəzaçəkmə Müəssisəsində işgəncəli şəraitə etiraz olaraq aclıq aksiyasına başladığını bildirib.

Novaka 2024-cü ilin noyabrında xarici təşkilatla məxfi əməkdaşlıq ittihamı ilə 4 il həbs cəzası kəsilib. "SOTAvision" jurnalistin cəzaçəkmə müəssisəsindəki ağır şəraitdən şikayətçi olduğunu yazır.

Novosibirskdəki Dzerjinski məhkəməsində fasilədə o bildirib ki, onu cərimə kamerasına salıblar, çünki koloniyada hər şeyin yaxşı, məhkumların məmnun olduğu barədə mediaya müsahibə verməkdən, eləcə də tikişçi kimi işləməkdən imtina edib.

Dediyinə görə, sərt şəraitə keçirildikdən sonra ona məktubların verilməsi dayandırılıb, koloniyanın əməkdaşları onu yeni qayda pozuntularına təhrik edirlər: "Burada dörd nəfərik, bizə işgəncə verirlər. Bir qızı iki gün döydülər. Döyüləndən sonra da təhrik edirlər ki, onu daha insani şəraitə keçirməsinlər".

Novak bildirib ki, koloniyanın rəhbərliyinin münasibəti dəyişməsə, ona bütün məktublar verilməsə, aqressiv kamera yoldaşı başqa yerə köçürülməsə, aclıq aksiyasını davam etdirəcək. O həmçinin mediaya və vətəndaşlara müraciət edərək koloniya ilə bağlı şikayətlər yazmalarını istəyib. Jurnalistin sözlərinə görə, durum "bundan pis ola bilməz", amma o, koloniya rəhbərliyi ilə heç bir əlaqə qura bilmir. Novak sonuncu dəfə avqustun sonunda cərimə təcridxanasına köçürüldükdən sonra aclıq elan etmişdi.

N.Novak "Chita Media"da çalışıb, sonra zab.ru saytının baş redaktoru olub. 2021-ci ildən Çitada "İstedadlılar" mərkəzinə rəhbərlik edib, orada musiqi və poeziya gecələri təşkil olunub. 2022-ci ildən AzadlıqRadiosu ilə ştatdankənar müxbir kimi əməkdaşlıq edib.

Azad Avropa/Azadlıq Radiolarının prezidenti Stiven Kapus hökm elan olunduqdan sonra Rusiyanı jurnalisti azad etməyə çağırıb: "Rusiyada AzadlıqRadiosunun jurnalisti Nika Novaka qarşı ədalətsiz hökmü qətiyyətlə pisləyirik. Bu siyasi motivli ittihamlar ayrı-ayrı jurnalistləri susdurmaq və onlara təzyiq niyyəti güdür".

Rusiyanın neft şirkətləri "Transneft" boru kəmərləri şəbəkəsinə tədarükləri azaltmayıb və bu il çatdırılmaların 2024-cü illə eyni səviyyədə qalması gözlənilir. Bunu "Transneft"in yüksək vəzifəli rəsmisi deyir.

Şirkətin birinci vitse-prezidenti Maksim Qrişanin jurnalistlərə bildirib ki, "Transneft"in mümkün tədarük artımını qarşılamağa yetərincə gücü var.

Rusiya OPEC və onun müttəfiqlərinin qərarlarına uyğun olaraq hasilatı artıracağı gözlənilir. "Transneft" ölkədə hasil olunan neftin 80 faizindən çoxunu nəql edir.

Qrişanin əlavə edib ki, vergi yükünün artması "Transneft"in nağd pul defisitini artırır və şirkət bəzi layihələri təxirə salaraq vəsaiti cari aktivləri dəstəkləməyə yönəltməli olur.

Ötən il Rusiya parlamenti "Transneft"in mənfəət vergisini 2025-2030-cu illər üçün 20 faizdən 40 faizə qaldırıb. Moskva bu yolla Ukraynadakı təcavüzkar müharibəni maliyyələşdirməyə əlavə vəsait axtarır.

Ukrayna və Rusiya bir-birinin enerji obyektlərinə qarşı hücumları intensivləşdirib, iyuldan bəri münaqişənin həlli üzrə sülh danışıqları dayanıb. Ötən ay Ukraynanın hücumları Baltik dənizi sahilində yerləşən Primorsk limanından Rusiyanın neft ixracını pozub.

ABŞ prezidenti Donald Tramp Mərkəzi Kəşfiyyat İdarəsinə (CIA) Venesuelada gizli əməliyyatlar aparmağa icazə verib. Bunu prezident oktyabrın 15-də təsdiqləyib.

Məxfi təlimat barədə "The New York Times" ABŞ rəsmilərinə istinadla yazmışdı. Onlar deyirdilər ki, Tramp administrasiyasının Venesuela ilə bağlı strategiyası Maduronu hakimiyyətdən kənarlaşdırmağı hədəfləyir. Administrasiya Maduronun narkotik qaçaqmalçılığı ittihamları ilə bağlı həbsinə aparacaq informasiyaya görə 50 milyon dollar təklif edir.

Məlumata görə, MKİ-yə Venesuelada ölümcül əməliyyatlar aparmağa icazə verilir.

Tramp jurnalistlərə bu qərarını venesuelalıların ABŞ-yə miqrasiyası və narkotik qaçaqçılığı ilə izah edib.

"Reuters" yazır ki, MKİ xüsusilə soyuq müharibə dövründə Latın Amerikasında əməliyyatlar aparıb, 20-ci əsrin sonunda kokain qaçaqçılığı imperiyalarının devrilməsinə kömək edib. Agentlik MKİ-nin Meksikada axtarılan narkotik alverçilərini izləmək üçün illərlə gizli əməliyyatlar keçirdiyini yazıb.

Venesuela hökuməti isə Trampın dediklərinin beynəlxalq hüququ pozduğunu bildirib.

Nikolas Maduro Venesuelada son prezident seçkisində qalib gəldiyini elan etsə də, müxalifət bununla razılaşmır. Avropa Parlamenti və ABŞ Dövlət Departamenti Edmundo Qonsalesi Venesuelanın seçilmiş prezidenti kimi tanıyıb.

Oktyabrın 15-də Böyük Britaniya Rusiyaya qarşı sanksiya siyahısını genişləndirib. Britaniya hökumətinin saytında dərc olunmuş siyahıya "Rosneft" və "Lukoil" kimi ən iri neft şirkətləri də salınıb.

“Kölgə donanması” ilə əlaqələndirilən 51 gəmi, Transstroybank, Primsoçbank, BBR Bank və Solid Bank daxil bir sıra banklar, Rusiyanın Milli Ödəniş Kartı Sistemi da sanksiyalara məruz qalacaq. Ümumilikdə 90 şəxs və təşkilat sanksiya siyahısına salınıb. Bunlar arasında Çin, Hindistan və Sinqapur şirkətləri də var.

Qərarın əsaslandırılmasında deyilir ki, "Rosneft" və "Lukoil" Rusiya hökuməti üçün strateji əhəmiyyət daşıyan enerji sektorunda fəaliyyətə görə siyahıya salınıblar.

“Rosneft” artıq Avropa İttifaqının (Aİ) sanksiya siyahısındadır. Böyük Britaniya G7 ölkələri arasında birinci ölkə olaraq “Lukoil”a sanksiya tətbiq edib. Aİ hazırda bu şirkətə qarşı sanksiya tətbiqini müzakirə edir. ABŞ isə hələlik, bu şirkətlərə sanksiya tətbiq etməyib.

Sanksiyalara aktivlərin dondurulması, səyahət qadağası və digər məhdudiyyətlər daxildir.

Siyahıdakı azərbaycanlılar

İndiyədək Böyük Britaniyanın sanksiya siyahısına bir sıra azərbaycanlılar da salınıb: Lukoil-un prezidenti Vahid Ələkbərov, “Kiyevskaya Ploşad” şirkətinin direktorlar şurasının sədri Qod Nisanov və onunla əlaqəli olan Zarax İliyev, "Coral Energy Group" neft ticarəti şirkətinin direktorları Əhməd Kərimov, Anar Mədətli, Tələt Səfərov, Etibar Eyyub, Tahir Qarayevin, “Mastel Makina” şirkətindən Şanlık Şükürov.

Siyahıda diqqətçəkən daha bir ad azərbaycanlı Fikrət Tağıyevdir. O, hüquqşünas Sergey Maqnitski 2009-cu ilin 16 noyabrında “Matrosskaya tişina” həbsxanasında vəfat edəndə həmin müəssisənin rəhbəri olub. Britaniya hökuməti F.Tağıyevin Sergey Maqnitski ilə pis rəftara görə cavabdehlik daşıdığını bildirir. Onun həmçinin Maqnitskinin ölüm şəraiti ilə bağlı dəlilin gizlədilməsində əli olduğu vurğulanır.

Suriyanın keçid dövrü prezidenti Əhməd əş-Şaraa Moskvaya rəsmi səfəri zamanı Kremldə Rusiya prezidenti Vladimir Putinlə görüşüb.

Əş-Şaraa ötən ilin sonunda Moskvanın müttəfiqi Bəşər Əsədi devirmiş silahlı müxalifət liderlərindən biri idi. Rusiya hərbçiləri isə vətəndaş müharibəsində Əsəd rejimini dəstəkləyib.

Suriya lideri daha öncə Məhəmməd əl-Colani ləqəbi ilə terrorçu kimi tanınırdı. Əsəd devriləndən sonra Moskva Suriyanın yeni hakimiyyətini tanıyıb.

Kreml Putinlə Suriya liderinin görüşün ilk dəqiqələrinin videosunu yayıb. Rusiya prezidenti bildirib ki, "Moskva Dəməşqlə münasibətlərində hər zaman Suriya xalqının maraqlarından çıxış edib", bu əlaqələrin daim dostluq xarakteri daşıdığını xatırladıb. Əş-Şaraa isə bildirib ki, Suriya hakimiyyəti Rusiya ilə əvvəlki bütün razılaşmalara hörmət edəcək.

Kremlin sözçüsü Dmitri Peskovun daha öncə dediyinə görə, danışıqlarda Rusiyanın Suriyada Əsəd dövründə yaradılmış hərbi bazaları da müzakirə olunacaq. Moskvanın Suriyada hərbi iştirakı azalsa da, Hmeymim hava bazası və Tartus limanındakı dəniz bazası hələ də fəaliyyət göstərir.

"Reuters" agentliyi və bir sıra ərəb KİV-ləri səfər öncəsi yazıblar ki, əş-Şaraa Moskvadakı danışıqlarda Rusiyada siyasi sığınacaq almış Əsədin təhvil verilməsini rəsmi tələb edə bilər. Bu barədə, hələlik, rəsmi məlumat verilməyib. Putinin əş-Şaraa ilə görüşünün nəticələri də açıqlanmayıb.

Rusiya 2015-ci ildə Suriyada vətəndaş müharibəsinə Əsədin tərəfindən müdaxilə edib. Bu, rəsmən "İslam Dövləti" (İŞİD) terror təşkilatına qarşı mübarizə ilə əsaslandırılıb. Amma Rusiya hərbi aviasiyası digər müxalifət qüvvələrini də hədəfə alıb. 2024-cü ildə üsyançıların qəfil hücumu nəticəsində Əsəd hakimiyyəti bir neçə günün içində devrilib və Rusiya hərbçiləri onu ölkədən çıxarıblar.

Ermənistanda altı keşişi mitinqlərdə iştiraka məcburetmə işi ilə bağlı saxlayıblar.

Saxlananlar Araqatsotn yeparxiyasının rəhbəri, yepiskop Mkrtiç Proşyan və yeparxiyanın beş keşişidir. Saxlanarkən onların evlərində axtarış da aparılıb.

Erməni kilsəsinin nümayəndəsi bildirib ki, bu həbslərə Nikol Paşinyan hökumətinin kilsəyə qarşı təzyiqlərinin tərkib hissəsi kimi baxırlar.

Vəkil Ara Zoqrabyan deyib ki, hüquqlarını müdafiə etdiyi yepiskop Proşyanın saxlandığı yer açıqlanmır. İstintaq orqanı bu haqda məlumatı olmadığını deyir.

Vəkil bunu ciddi qanun pozuntusu adlandırıb, adam oğurluğu kimi qiymətləndirib.

Ermənistanın İstintaq Komitəsi keşişlərin saxlanması xəbərlərini nə təkzib, nə də inkar edib, amma bildirib ki, hakimiyyətdən sui-istifadə edərək vətəndaşların ictimai toplantılarda iştirakına müdaxilə üzrə istintaq başladılıb.

Yeparxiyanın ruhaniləri ilə bağlı araşdırma sentyabrda başlanıb. O zaman yeparxiyaya aid kənd monastırının ruhanisi olmuş Aram Asatryan İctimai Televiziyaya müsahibəsində demişdi ki, 2021-ci ildə müxalifətin mitinqlərinə öz iradəsi əleyhinə, yepiskop Proşyanın göstərişi ilə qatılıb.

Mitinqlər 2020-ci ilin 44 günlük müharibəsindən sonra Qarabağda atəşkəs razılaşmasına qarşı keçirilirdi.

Bir müddət öncə baş nazir erməni kilsəsinin rəhbərinə qarşı ittihamlar səsləndirmişdi. N.Paşinyan erməni kilsəsinin rəhbərini nikahsızlıq vədini pozmaqda ittiham edərək istefaya çağırmışdı.

Amma sonradan ittihamlardan imtina etməsə də, kobud ifadələrdən istifadə etdiyi üçün sosial şəbəkədə üzr istəmişdi.

Kilsə ilə Paşinyan arasında münasibətlər Ermənistanın məğlub olduğu İkinci Qarabağ savaşından sonra pisləşib. Kilsə də müxalifət kimi Paşinyanı istefaya çağırıb.

Oktyabrın 3-də Erməni Apostol Kilsəsinin Şirak yeparxiyasının rəhbəri arxiyepiskop Mikael Acapaxyan 2 il müddətinə azadlıqdan məhrum edilib. O, hakimiyyəti ələ keçirməyə çağırışda təqsirli bilinib.

Ukrayna prezidenti Volodimir Zelenski Odessa şəhər hərbi administrasiyasını yaradıb, Sergey Lısakı onun rəhbəri təyin edib. Lısak daha öncə Dnepropetrovsk vilayəti hərbi administrasiyasına rəhbərlik edirdi.

Oktyabrın 14-ü axşam Zelenski videomüraciətində deyib ki, Odessa daha çox müdafiə və dəstəyə layiqdir və bu, hərbi administrasiya formatında gerçəkləşə bilər: "Odessada təhlükəsizliklə bağlı çoxsaylı məsələlər uzun müddət gərəyincə həll edilməyib. Bütün effektli qərarlar veriləcək. Yaxın vaxtlarda hərbi administrasiyanın rəhbərini təyin edəcəyəm".

Zelenski Odessanın meri Gennadi Truxanovu Ukrayna vətəndaşlığından məhrum edib. Ukrayna Təhlükəsizlik Xidmətinin məlumatına görə, Truxanov Rusiya vətəndaşıdır və aktiv xarici pasportu var. Onun pasportu 2014-cü il dekabrın 15-də Krım və Donetsk, Luqansk vilayətlərinin bir hissəsinin işğalından sonra aldığı bildirilir

Truxanov bunu inkar edir, başqa ölkələrin pasportuna sahib olmadığını deyir. O, məhkəməyə müraciət edəcəyini, məhkəmə qərar verə bilməsə, Avropa İnsan Hüquqları Məhkəməsinə üz tutacağını bildirib: "Bu, artıq qanunsuzluğun son həddidir, buna yol verilməməlidir".

G.Truxanovun sözlərinə görə, o, yerli özünüidarəetmə haqqında qanuna uyğun olaraq, şəhər deputatları qərar qəbul edənəcən mer vəzifəsində olaraq qalacaq.

Odessa Ukraynanın Qara dəniz sahilində yerləşən böyük liman şəhəridir, Rusiyanın davamlı hava zərbələrinə məruz qalır.

Avropa İnsan Haqları Məhkəməsi (AİHM) Rusiyanın Gürcüstana 253 milyon avro ödəməli olmasına dair qərar çıxarıb. Bu məbləğ 1990-cı illərin əvvəllərində Tbilisidən ayrılaraq müstəqilliyini elan etmiş Abxaziya və Cənubi Osetiya bölgələri ilə Gürcüstan arasında baryerlərin qurulmasına görə təyin olunub. Məlumatı "Nastoyaşee Vremya" yayıb.

Moskva 2008-ci ildə Gürcüstanla beşgünlük müharibədən sonra bu bölgələrin müstəqilliyini tanıyıb. "Gürcüstan Rusiyaya qarşı" işi üzrə məhkəmə qərarında bildirilir ki, 2009-cu ildən Rusiya hərbçilərinin iştirakı ilə keçmiş inzibati sərhəd boyunca tikanlı məftilli metal hasar çəkilib. Tbilisi bu səddi "işğal xətti" adlandırır.

Məhkəmə Rusiyanın Avropa İnsan Haqları Konvensiyasını sistemli pozduğunu qeyd edib. Bu pozuntulara sərhədi keçdiyinə görə qanunsuz həbslər, aşırı güc tətbiqi, işgəncə və qeyri-insani rəftar, hərəkət azadlığına və evə, torpağa və ailəyə çıxışa məhdudiyyətlər, eləcə də gürcü dilində təhsilə qadağa daxildir.

Rusiya 2022-ci ildən AİHM-in qərarlarını tanımır.

Rusiyanın Ukraynaya dron hücumlarında azı dörd nəfər həlak olub, onlarla yaralı var. Xarkovda xəstəxana kompleksi də vurulub.

Xarkov vilayətinin qubernatoru Oleq Sinequbov oktyabrın 14-də deyib ki, Rusiya qüvvələri ötən gecə şəhəri və yaxınlıqdakı səkkiz məntəqəni atəşə tutub, azı 62 nəfər xəsarət alıb.

Xarkovun meri İqor Terexovun sözlərinə görə, Rusiyanın qanadlı bomba hücumu zamanı xəstəxanadakı 57 pasiyent başqa tibb ocağına köçürülüb. Şüşənin qırılması nəticəsində altı nəfər xəsarət alıb.

Ukrayna prezidenti Volodimir Zelenski zərbəni pisləyib, "həyatların xilas olunduğu məkana tamamilə terrorçu, sinik hücum" adlandırıb.

Ukraynanın xarici işlər naziri Andrey Sibiqa isə X platformasında Xerson vilayətində BMT humanitar konvoyuna Rusiyanın hücum etdiyini yazıb.

BMT yardım konvoyuna Rusiyanın dron zərbəsini pisləyib, "tamamilə qəbuledilməz" adlandırıb.

Donetsk və Zaporojye vilayətlərində isə Rusiyanın zərbələrindən hərəsində iki olmaqla dörd sakin öldürülüb.

Rusiya aylardır Ukraynanın şəhərlərini və infrastrukturunu hədəfə alır. Moskva mülki hədəfləri bilərəkdən vurmadığını desə də, bunun əksini göstərən dəlil sayı artır.

10 oktyabr

Kiyevin şərqində elektrik kəsilib

Oktyabrın 10-na keçən gecə Rusiyanın hücumları Kiyevin şərqində elektrikin kəsilməsinə səbəb olub. Ukrayna paytaxtının mərkəzində isə çoxmərtəbəli binada yanğın baş verib. Rəsmilərin ölkənin enerji infrastrukturuna zərbə endirildiyini deyirlər.

Kiyev hərbi administrasiyasının rəhbəri Timur Tkaçenko bildirib ki, şəhərin mərkəzi rayonlarından birində çoxmərtəbəli binanın 6-cı və 7-ci mərtəbələrinə dron zərbəsi yanğına səbəb olub. Hücumda həm dronlardan, həm də raketlərdən istifadə edilib.

Onlayn video və fotolarda yanan mənzillər, yanğınsöndürənlərin alovu söndürməyə çalışdığı görünür.

Kiyevin meri Vitali Kliçko doqquz nəfərin xəsarət aldığını, onlardan beşinin xəstəxanaya yerləşdirildiyini bildirib. Onun sözlərinə görə, şəhərin şərq rayonlarında elektrik kəsilib: "Paytaxtın sol sahili işıqsız qalıb. Su təchizatında da problemlər var".

Ukrayna Hərbi Hava Qüvvələri hücumu "kütləvi" adlandırıb. Paytaxt üzərində bir neçə partlayış və dron səsləri eşidilib.

Energetika naziri Svetlana Qrinçuk hücum nəticəsində ölkənin enerji infrastrukturuna da ziyan dəydiyini açıqlayıb.

Ukraynanın cənub-şərqdə yerləşən Zaporojye şəhərində də gecə saatlarında bir neçə obyektə dron hücumları olub. Vilayət qubernatoru İvan Fyodorov bildirib ki, hücumda yaralanmış 7 yaşlı uşaq xəstəxanada vəfat edib.

Venesuela Norveç və Avstraliyadakı səfirliklərini bağladığını, Burkina-Faso və Zimbabvedə yeni diplomatik nümayəndəliklər açdığını elan edib. Oktyabrın 10-da venesuelalı müxalifətçi Mariya Korina Maçadoya Nobel Sülh Mükafatı verilmişdi.

Nikolas Maduro hökuməti qərarın "resursların strateji yenidən bölüşdürülməsi", diplomatik xidmətin restrukturizasiyası çərçivəsində qəbul olunduğunu bildirib.

Norveç Xarici İşlər Nazirliyi (XİN) səfirliyin bağlanması barədə bildiriş aldığını, amma səbəbin açıqlanmadığını deyib.

Oktyabrın 12-də prezident Maduro Hindilərin müqavimət günü ilə bağlı tədbirdə çıxışında Maçadonu "iblisanə cadugər" adlandıraraq deyib ki, "əhalinin 90 faiz onu rədd edir".

Nobel Komitəsi oktyabrın 10-da Maçadoya Nobel mükafatının Venesuela xalqının demokratik hüquqları uğrunda mübarizəsinə görə verildiyini açıqlayıb.

Maçado Venesuela parlamentinin keçmiş deputatıdır. O, 2014-cü ildə ölkədə kütləvi etirazların əsas fiqurlarından biri olub. 2023-cü ildə prezidentliyə namizəd olmaq üçün ilkin seçkiləri udub, amma hakimiyyət onun namizədliyini ləğv edib. Sonra prezidentliyə Edmundo Qonsales namizəd göstərilib. Hazırkı prezident N.Maduro seçkilərdə qalib gəldiyini elan etsə də, BMT də daxil olmaqla müstəqil müşahidəçilər buna etiraz edib. Avropa Parlamenti və ABŞ Dövlət Departamenti E.Qonsalesi Venesuelanın seçilmiş prezidenti kimi tanıyıb.

2025-ci ilin yanvarında Maduronun andiçmə mərasimindən öncə Maçadonun qaçırıldığı bildirilir. Bəzi mənbələr onun təhlükəsizliyinə görə gizləndiyini yazır.

Biznesmen Mixail Xodorkovski və "Rusiya Antimüharibə Komitəsi"nin daha 22 üzvü Rusiyada hakimiyyəti zorakı yolla ələ keçirməkdə və terrorçu birləşmə təşkil etmək və orada iştirakda ittiham olunur. FTX-nin İctimai Əlaqələr Mərkəzi bu ittihamlar üzrə cinayət işi başlandığını bildirir.

İş üzrə digər təqsirləndirilənlər keçmiş baş nazir Mixail Kasyanov, şahmat üzrə dünya çempionu Harri Kasparov, siyasətçilər Leonid Qozman, Vladimir Kara-Murza, Maksim Reznik, Dövlət Dumasının keçmiş deputatı Dmitri Qudkov, "Novaya qazeta – Yevropa"nın baş redaktoru Kirill Martınov, jurnalist Viktor Şenderoviç, qalereya sahibi Marat Qelman, aktyor Artur Smolyaninov, politoloq Yekaterina Şulman, biznesmenlər Yevgeni Çiçvarkin, Boris Zimin, iqtisadçı Sergey Aleksaşenkodur.

İstintaq bildirir ki, "Rusiyadakı mövcud hakimiyyətin ləğvinin zəruriliyi" komitənin təsis sənədində ifadə olunub. Həmçinin bildirilir ki, Xodorkovski və təşkilatın digər üzvləri "Ukraynanın Rusiyada terrorçu kimi tanınan hərbi millətçi birləşmələrini maliyyələşdirir, bu dəstələrə adam cəlb edirlər ki, sonradan Rusiyada hakimiyyətin zorla ələ keçirilməsi planını gerçəkləşdirsinlər".

Xodorkovski barəsində əlavə olaraq terrorçuluğa açıq çağırışlar maddəsi üzrə də cinayət işi başlanıb.

"Rusiya Antimüharibə Komitəsi" 2022-ci ilin fevralında yaradılıb. Məqsədi Rusiyanın Ukraynaya qarşı genişmiqyaslı müharibəsinə qarşı çıxmaqdır. Komitənin saytında deyilir: "Biz insan həyatının dəyərinə və hər kəsin azadlıq hüququna inanırıq. Putin rejimi bu prinsiplərə birbaşa təhdiddir. Məqsədimiz bu rejimə qarşı mübarizə üçün gücləri birləşdirməkdir".

2024-cü ilin yanvarında Rusiya Baş Prokurorluğu bu komitəni "arzuolunmaz təşkilatlar" siyahısına salıb.