ABŞ prezidenti Donald Tramp sentyabrın 19-da H-1B işçi vizaları üçün 100 min dollarlıq rüsum tələb olunacağını açıqlayıb. Hazırda bu viza lotereyasında qeydiyyatdan keçməyin qiyməti 215 dollardır. Viza müraciətinə sponsorluq edən işəgötürəndən isə 780 dollar istənilir.
"The Financial Times" Trampın açıqlamasının şirkətlərə və işçilərə şok yaratdığını yazır. Qəzet bu rüsumun vizaya sponsorluq edən şirkətlərin çoxunu çəkindirəcəyini qeyd edir.
H-1B vizası şirkətlərə IT, səhiyyə, mühəndislik sahələri üzrə müvəqqəti olaraq xarici işçi götürmək icazəsi verir.
Nyu-Yorkda MBA tələbəsi olan hindistanlı Dineş çox çətin duruma düşdüyünü deyib.
730 min viza sahibi + 550 min nəfər
Hazırda ABŞ-də H-1B vizası olan təcrübəli işçilərin 70 faizindən çoxu hindistanlıdır. Bu viza Amerikada karyera qurmaq istəyən hindistanlı məzunlar və peşəkarlar üçün ən arzulanan yollardan biri olub. ABŞ-də 730 minədək H-1B viza sahibinin, onların da himayəsində 550 min nəfərin olduğu bildirilir.
"ABŞ-yə müraciət edən xarici tələbələrin sayı kəskin azalacaq. Onlar astronomik tələbə kreditləri ilə üzləşəcəklər, ABŞ-də işləmək imkanları isə olmayacaq", – bunu "West Coast" texnologiya şirkətinin təmsilçisi deyib.
Ağ ev onu bildirib ki, yeni rüsum fevraldan lotereyaya müraciət edənlərə aid olacaq, yəni, hazırkı viza sahiblərinə deyil.
FT yazır ki, H-1B proqramı ABŞ-də "Alphabet"in sahibi Sundar Piçai, "Microsoft"un baş direktoru Satya Nadella kimi korporativ liderlər yetişdirib. Tramp və tərəfdarları isə Hindistanın və ABŞ-nin texnologiya şirkətlərini amerikalı işçilərin hesabına daha ucuz əmək idxalında ittiham edirlər.
Zərbə startaplara dəyəcək
CNBC isə 100 min dollarlıq rüsumun Amerikanın startap məkanına ziyan vuracağını yazır. Məsələ ondadır ki, məhdud illik kvotadan dolayı ABŞ startapları H-1B vizalarını onsuz da çətinliklə əldə edirdilər.
San-Fransiskoda yerləşən, peşəkarlara, digər startaplara immiqrasiya üzrə məsləhətlər verən "Alma" şirkətindən CNBC-yə bildirilib ki, Ağ evin son açıqlamasından sonra müraciətlərin sayı 100 dəfə artıb.
"Müştərilər qorxu və narahatlıq içindədirlər, çünki onların şirkətlərinin ölçüsü 100 min dollarlıq rüsumu ödəməyə, maaş baxımından rəqabətə imkan vermir", – "Alma"nın qurucusu və baş direktoru Ayzada Marat deyib.
"Əsas problem ondadır ki, bu beynəlxalq istedadlar ölkədən getsə, yerli bazarda tələbatı ödəməyə yetərincə kadr varmı?", – Marat sual edir. O deyir ki, startaplar daha çox "kəşf olunmamış" xarici istedadları tapmaqla böyük rəqiblər üzərində üstünlük qazanmağa çalışırlar.
Avropada bir çox bazarlar son illər beyin axınından gileylənirdilər. Təcrübəli və təhsilli işçilər ABŞ kimi ölkələrdə daha yaxşı fürsətlərin dalınca gedirdi. Mütəxəssislərin fikrincə, indi H-1B vizası ətrafında baş verənlər belə istedadlar üçün dönüş nöqtəsi yarada, onlar elə Avropada karyera qurmağı nəzərən keçirə bilərlər.
