Azərbaycan xəbərləri
Taleh Bağırovun aclığı dayandırdığı deyilir
Müsəlman Birliyi Hərəkatının (MBH) həbsdə aclıq aksiyası keçirdiyi deyilən sədri Taleh Bağırovun onu dayandırdığı bildirilir.
Bu barədə MBH-dən məlumat verilib. Açıqlamaya görə, T.Bağırov bu gün, iyunun 23-də yaxınlarına zəng vuraraq bu barədə bildirib.
"Aclıq aksiyasının dayandırılmasının səbəbi kimi çoxsaylı çağırışlar, həbsxanalarda onun aksiyasına qoşulan şəxslərin səhhətlərində yaranan problemlər və onların ailələrinin narahatçılığı göstərilib", - MHB-dən qeyd ediblər.
Bu məlumatı, hələlik, rəsmi qurumlardan dəqiqləşdirmək mümkün olmayıb.
Vəkil Taleh Bağırovla görüşüb
Vəkil Fəxrəddin Mehdiyev bu gün, iyunun 20-də Müsəlman Birliyi Hərəkatının həbsdə olan sədri Taleh Bağırovla görüşüb. Vəkilin sözlərinə görə, T.Bağırov aclıq aksiyasını davam edir: "Davam etməkdə də israrlıdır".
F.Mehdiyev qeyd edib ki, T.Bağırovun səhhətində problem var: "Aclığın 18-ci günüdür və artıq onun nəticəsi özünü göstərir. Taleh Bağırov arıqlayıb, sifəti ağarıb, səsi zəifləyib. Həmçinin, qızdırması düşmür".
Vəkil bildirib ki, T.Bağırov həkim nəzarəti altındadır.
Amma bu deyilənləri, hələlik, Penitensiar Xidmətdən dəqiqləşdirmək mümkün olmayıb.
Taleh Bağırova dəstək aksiyası olub
İyunun 17-də Ədliyyə Nazirliyinin qarşısında Müsəlman Birliyi Hərəkatının həbsdə aclıq aksiyası keçirdiyi bildirilən sədri Taleh Bağırova təkadamlıq dəstək aksiyası keçirilib.
Fariz Əliyev kimi özünü təqdim edən bir şəxs əlində plakat tutaraq "Fikrət Məmmədov (ədliyyə naziri) çıx, cavab ver. İnsanın həyatı ilə oynamayın" şüarı səsləndirib.
O bildirib ki, T.Bağırov artıq 14 gündür aclıq edir. "Ədliyyə Nazirliyi susqundur. Mən Fikrət Məmmədova etiraz edirəm. Bu mənim konstitusion hüququmdur", - o vurğulayıb.
F.Əliyev özü də artıq iki gündür aclıq aksiyası keçirdiyini qeyd edib.
Ədliyyə Nazirliyinin əməkdaşları onu qəbul şöbəsinə dəvət etsələr də, o bundan imtina edib.
F.Əliyevi aksiya yerindən uzaqlaşmaq istəyərkən polis əməkdaşları saxlayıb. Sonradan onun sərbəst buraxıldığı açıqlanıb.
Taleh Bağırovun aclıq aksiyasını davam etdirdiyi bildirilir
İyunun 13-də Müsəlman Birliyi Hərəkatının həbsdə 10 gündür aclıq aksiyası keçirdiyi bildirilən rəhbəri Taleh Bağırov ailəsinə zəng vurub.
Bu barədə onun həyat yoldaşı Leyla Bağırova keçirdikləri mətbuat konfransında məlumat verib. Onun vurğulamasına görə, dünən, iyunun 12-də həyat yoldaşı ilə görüşmək istəyib: "Buna icazə verilmədi. Bu gün, iyunun 13-də zəng vurdu, bildirdi ki, iki gündür qızdırması var, gözləri qaralır. Həkim deyib ki, bu, təhlükəli haldır…".
Hüquq müdafiəçisi Rüfət Səfərov isə İnsan Hüquqları üzrə Müvəkkilə-Ombudsmana müraciət edib ki, məsələni nəzarətə götürsünlər: "Heç olmasa, sabah Qobustan Qapalı Həbsxanasına getsinlər, vəziyyətlə maraqlansınlar".
Mətbuat konfransında vurğulanıb ki, T.Bağırovun aksiyasına həbsxanada başqa qoşulanlar da var.
Bu deyilənlərə, hələlik, Ombudsman Aparatı və rəsmi qurumlardan münasibət almaq mümkün olmayıb.
Taleh Bağırovun aclıq aksiyası keçirdiyi bildirilir
Müsəlman Birliyi Hərəkatının sədri Taleh Bağırovun iyunun 3-dən aclıq aksiyasına başladığı deyilir. Onun həyat yoldaşı Leyla İsmayılzadənin verdiyi məlumata görə, əri iyunun 3-də aclıq aksiyasına başlaması ilə bağlı Qobustan Qapalı Həbsxanasının rəhbərliyini rəsmi qaydada məlumatlandırıb.
L.İsmayılzadə iyunun 5-də həyat yoldaşı ilə telefonla danışıb: "O, səhhətində hələ problem olmadığını bildirdi".
Verilən məlumatlara görə, T.Bağırovun aclıq aksiyası inanclı insanların son günlər saxlanması zamanı işgəncə və təhqirlərlə üzləşməsi şikayətləri ilə bağlıdır. Amma bu deyilənləri, hələlik, Penitensiar Xidmətlə dəqiqləşdirmək mümkün olmayıb.
Daxili İşlər Nazirliyi isə son günlər Müsəlman Birliyi Hərəkatının saxlanıb sərbəst buraxılan üzvlərinin işgəncə və təhqirlərlə üzləşməsi ilə bağlı şikayətlərini təkzib edib.
Mayın 20-də Bakı Ağır Cinayətlər Məhkəməsində Müsəlman Birliyi Hərəkatının üzvü Razi Abbasov barəsində hökm oxunub. O, narkotik maddə saxlamaqda ittiham edilərək 6 il azadlıqdan məhrum edilib. Bu zaman polis prosesi izləmək üçün gələn, məhkəmənin qarşısında toplaşan şəxsləri oradan uzaqlaşdırıb. Beş nəfər saxlanılıb, Müsəlman Birliyi Hərəkatının üç üzvü - İmran Məmmədli, Elgiz Məmmədov və Ağəli Yəhyayev polisə müqavimət ittihamı ilə təqsirləndirilərək 1 aylıq inzibati həbsə məhkum edilib, digər iki fəal saxlanıldıqdan bir neçə saat sonra sərbəst buraxılıb.
Onlardan biri - Mail Kərimov deyib ki, onu məhkəmənin qarşısında saxlayıb əvvəlcə 22-ci polis bölməsinə, sonra isə Baş Mütəşəkkil Cinayətkarlıqla Mübarizə İdarəsinə aparıblar. Kərimov həm yolda, həm də idarədə işgəncələrə məruz qaldığını bildirib. Hərəkatın digər fəalı Süleyman Ələkbərov da buna bənzər bəyanat verib. Daxili İşlər Nazirliyi isə öz növbəsində bu bəyanatları əsassız və yalan adlandırıb.
Xatırlatma
Taleh Bağırov 2015-ci il noyabrın 26-da Baş Mütəşəkkil Cinayətkarlıqla Mübarizə İdarəsinin Bakının Nardaran qəsəbəsində keçirdiyi əməliyyatda həbs olunub. İkisi polis olmaqla, altı nəfərin həlak olduğu həmin əməliyyat nəticəsində ilahiyyatçı ilə yanaşı, daha bir çox şəxs saxlanılıb. Onlara qətl və bir çox başqa cinayətlərlə bağlı ittihamlar verilib. T.Bağırov 20 il həbs cəzası alıb. O və tərəfdarları məhkəmədə bütün ittihamları yalanlayaraq polisləri də onların güllələmədiklərini vurğulayıblar.
Aclıq aksiyasına qoşulanların olduğu deyilir
İyunun 3-də Qobustan Qapalı Həbsxanasında aclığa başladığı deyilən Taleh Bağırovun aksiyasına həbsdən qoşulanların olduğu da bildirilir. Bunların Müsəlman Birliyi Hərəkatının üzvləri Abbas Hüseynov, Cabbar Cabbarov, həmçinin jurnalist Polad Aslanov olduğu deyilir.
Bu barədə həmin məhbusların yaxınları məlumat yayıblar. Amma bu məlumata, hələlik, Penitensiar Xidmətdən münasibət almaq mümkün olmayıb.
A.Hüseynov və C.Cabbarov da Nardaran hadisələri ilə bağlı mühakimə ediliblər. A.Hüseynov 20, C.Cabbarov 19 il həbs cəzası alıb.
2019-cu ildə tutulan P.Aslanov isə Cinayət Məcəlləsinin 274-cü maddəsi ilə - dövlətə xəyanətdə təqsirli bilinərək 16 il həbs cəzası alıb.
Onların heç biri həbsini düzgün saymır.
Bütün xəbərləri izləyin
Azərbaycanda işsiz kimi qeydiyyata düşənlər artır
2025-ci il sentyabrın 1-nə Dövlət Məşğulluq Agentliyinin yerli qurumlarında qeydiyyata alınmış işsiz şəxslərin sayı 237 min nəfər olub. Onların 50.1 faizini qadınlar təşkil edib. İşsizlikdən sığorta ödənişinin orta aylıq məbləği 436.7 manata yüksəlib.
Bu barədə məlumatı Dövlət Statistika Komitəsi (DSK) yayıb.
Bu ilin əvvəlində qeydiyyata alınmış işsizlər 217.2 min nəfər olub. Həmin vaxt onların 47.6 faizi qadınlar idi.
Həmin rəqəmlərin təhlili göstərir ki, səkkiz ayda işsiz kimi qeydiyyata düşənlərin sayı 20 min artıb.
DSK-nın məlumatına görə, ilin əvvəlindən ölkədə muzdla işləyənlərin sayı da ümumilikdə 10 mindən, ayrıca dövlət sektorunda çalışanlar isə 24 mindən çox azalıb.
Müstəqil iqtisadçılar rəsmi işsizlərin sayı ilə bağlı rəqəmə şübhə ilə yanaşırlar. Onlar deyirlər ki, ölkədə faktiki işsizlər bu rəqəmdən daha çoxdur.
Son rəsmi rəqəmlərə görə, ölkədə məşğul əhalinin sayı 5 milyon 355 min 400 nəfər təşkil edib. Muzdla işləyənlər isə 1.7 milyondan bir qədər çoxdur. Müstəqil ekspertlər hesab edir ki, ölkədə bir neçə milyon insan qeyri-rəsmi fəaliyyət göstərir.
Təhsil İnstitutu: Dinlənən hər 10 dərsdən 7-də tədrisin keyfiyyəti zəif olub
"Dörd ildə 400 məktəbdə 17 min 300 dərsdinləmə aparılıb".
AZƏRTAC-ın xəbərinə görə, bunu bu gün, sentyabrın 12-də Təhsil İnstitutunun direktor əvəzi Elnur Əliyev "2025-2026-cı tədris ili: yeniliklər və hədəflər" mövzusunda keçirilən tədbirdə söyləyib.
O bildirib ki, dinlənən hər 10 dərsdən 7-də tədrisin keyfiyyəti zəif olub.
Azərbaycanda 4 min civarında orta məktəb olduğu bildirilir. Tədrisin keyfiyyəti ilə bağlı tez-tez valideynlər və ayrı-ayrı ekspertlərdən də narazılıqlar eşidilir.
Hətta bildirilir ki, orta məktəblərdə təhsil keyfiyyətli tədris olunmadığından valideynlər repetitorlara müraciət etməli olurlar. Bu da onların ailə büdcələrinə mənfi təsirlər göstərir.
'Formula 1' zamanı bəzi məktəblərdə tədris onlayn keçiriləcək
"Formula 1" ilə bağlı bəzi məktəblərdə tədris müvəqqəti onlayn formada keçirilə bilər.
Yerli saytların məlumatına görə, bunu bu gün, sentyabrın 11-də elm və təhsil naziri Emin Əmrullayev yeni tədris ilinə dair media üçün brifinqdə deyib.
Nazir bildirib ki, 6 nömrəli məktəb, 132-134 saylı təhsil kompleksi və digər mərkəzə yaxın müəssisələrdə tədris bəzi günlər distant formada təşkil ediləcək: "Biz bu müəssisələrin siyahısını elan edəcəyik. Bu qərar bütün məktəblərlə bağlı deyil".
Bu il "Formula 1" Azərbaycan Qran Prisi sentyabrın 19-21-də keçiriləcək. Yeni tədris ili isə sentyabrın 15-də başlayır.
2016-cı ildən bəri "Formula 1" yarışlarına ev sahibliyi edən Azərbaycan bununla bağlı tədbirlərin təşkilinə milyon manatlarla vəsait xərcləyir. Lakin ümumilikdə rəqəmlərin detalları ictimaiyyətə açıqlanmır. Rəsmilər, bir qayda olaraq, vurğulayırlar ki, beynəlxalq idman yarışları ölkəyə xeyli turist cəlb edir, büdcəyə milyonlarla gəlir gətirir. Bəzi ekspertlər də gəlirin qazancdan dəfələrlə az olduğunu iddia edirlər.
Tənqidçilər isə bildirirlər ki, bu vəsait təhsil, səhiyyə, regional inkişaf kimi daha vacib sahələrə yönəldilə bilərdi.
ABŞ-dən gələn elçilər Bakıda Anlaşma Memorandumunun icrasından danışıblar
Bu gün, sentyabrın 10-da Azərbaycan xarici işlər naziri Ceyhun Bayramov ABŞ Dövlət Departamentinin Avropa və Avrasiya məsələləri üzrə Bürosunun baş rəsmisi Brendan Hanrahanı qəbul edib.
Bu barədə Azərbaycan Xarici İşlər Nazirliyi (XİN) məlumat yayıb.
Məlumata görə, görüşdə iki ölkənin münasibətləri, Strateji Tərəfdaşlıq Xartiyasının hazırlanması məqsədilə Strateji İşçi Qrupun yaradılması haqqında Anlaşma Memorandumundan irəli gələn məsələlər, Azərbaycan-Ermənistan normallaşma prosesi, habelə qarşılıqlı maraq doğuran regional və beynəlxalq təhlükəsizlik məsələləri müzakirə olunub.
"Vaşinqton görüşü nəticəsində Azərbaycan-Ermənistan sülh gündəliyinin irəlilədilməsi istiqamətində əldə olunan tarixi razılıqların, o cümlədən sülh müqaviləsinin paraflanması və keçmiş münaqişənin qalıqları olan strukturların ləğvi üzrə atılan addımların vacibliyi vurğulanıb", - məlumatda əlavə edilib.
Bu il avqustun 8-də Azərbaycan ilə Birləşmiş Ştatlar arasında Strateji Tərəfdaşlıq Xartiyasının hazırlanması məqsədilə Strateji İşçi Qrupun yaradılması haqqında anlaşma memorandumu imzalanıb. Həmin gün habelə Vaşinqtonda Azərbaycan və Ermənistan rəsmiləri bu iki ölkə arasında sülh müqaviləsinin mətnini paraflayıblar. Oval ofisdə ABŞ prezidentinin iştirakı ilə tərəflər görüşün nəticələri haqda bəyannamə də imzalayıblar. Bəyannaməyə əsasən, Ermənistanın cənubundan keçməklə Azərbaycanın əsas hissəsi ilə Naxçıvan arasında maneəsiz əlaqə yaranacaq. TRIPP adlanan bu marşrut Ermənistanın suverenliyini, ərazi bütövlüyünü və yurisdiksiyasını qoruyub saxlayacaq.
Xatırlatma
Ötən əsrin 80-ci illərində gərginləşən Qarabağ münaqişəsi Azərbaycan və Ermənistan arasında toqquşmalara səbəb olub. 1990-cı illərin əvvəllərində Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində suverenliyini bərpa edib.
Son illər iki ölkə arasında müxtəlif formatlarda sülh danışıqları aparılırdı.
Azərbaycanda inflyasiyanın 4.9 faiz olması inandırıcıdırmı?
Dövlət Statistika Komitəsi bu gün, sentyabrın 10-da bildirib ki, 2025-ci ilin avqustunda istehlak qiymətləri indeksi 2024-cü ilin avqustuna nisbətən 4.9 faiz olub. O, cümlədən qida məhsulları, alkoqollu içkilər və tütün məmulatları 6.6 faiz, qeyri-qida məhsulları 2.1 faiz, əhaliyə göstərilmiş ödənişli xidmətlər isə 4.9 faiz bahalaşıb.
Amma Azərbaycanda bir çox müstəqil iqtisadçılar bu rəqəmə şübhə edirlər. Onların fikrincə, ölkədə real inflyasiya ikirəqəmlidir.
Elə bu gün, sentyabrın 10-da Mərkəz Bankı (AMB) da bildirib ki, son aylar inflyasiya üzrə risk balansında əhəmiyyətli dəyişiklik müşahidə olunmayıb. "Qlobal ticarətdə gedən proseslər əmtəə və maliyyə bazarlarında dalğalanmalara səbəb olmaqda davam edir. Bu şəraitdə idxal qiymətləri inflyasiyanın əsas xarici risk faktoru kimi hesab olunur", - açıqlamada vurğulanır.
Beynəlxalq Valyuta Fondunun (BVF) məlumatına görə isə, 2025-ci ilin iyulunda əmtəə qiymətləri indeksi illik 0.7, o cümlədən ərzaq qiymətləri indeksi 3.3 faiz azalıb.
Müstəqil iqtisadçılar da hesab edirlər ki, ölkədə bahalaşmaya daha çox daxili amillər təsir göstərir. Onlar xatırladırlar ki, elə bu il hökumət bir sıra sahələrdə kommunal xərcləri artırıb.
ABŞ təmsilçiləri Bakıda Orta Dəhlizi müzakirə ediblər
Sentyabrın 8-də Azərbaycan xarici işlər naziri Ceyhun Bayramov Bakıda səfərdə olan Amerika Birləşmiş Ştatlarının (ABŞ) Orta Dəhliz üzrə Sertifikatlaşdırılmış Ticarət Missiyasının nümayəndələrini qəbul edib.
Bu barədə Azərbaycan Xarici İşlər Nazirliyi (XİN) məlumat yayıb.
Məlumata görə, görüşdə bu il avqustun 8-də Vaşinqtonda Azərbaycan, ABŞ prezidentlərinin və Ermənistanın Baş nazirinin iştirakı ilə aparılmış müzakirələr, imzalanmış sənədlərin tarixi əhəmiyyəti qeyd olunub. Bu razılaşmaların regional sülh və tərəqqiyə töhfəsi qeyd edilməklə yanaşı, Azərbaycan-ABŞ əlaqələri üçün böyük perspektivlər açdığı vurğulanıb.
Açıqlamaya görə, görüşdə habelə, Azərbaycanın son onilliklər ərzində Orta Dəhlizin canlandırılması və işlək vəziyyətə gətirilməsi üçün göstərdiyi səylərdən bəhs olunub: “Ölkəmizin hazırda nəhəng bərpaolunan enerji resurslarının inkişafı və Avropaya ötürülməsi üzrə tərəfdaş ölkələrlə genişmiqyaslı fəaliyyətlər həyata keçirdiyi qeyd olunub...”
"Rusiya və İran dəhlizin istifadəyə verilməsini istəmir"
ABŞ şirkətləri "Tramp yolu" ilə bağlı layihələrdə iştirak etmək və tenderlərdə öz təkliflərini təqdim etmək imkanını böyük məmnuniyyətlə dəyərləndirəcəklər. Bunu ABŞ İqtisadi maliyyələşdirmə korporasiyasının icraçı direktoru Kennet Angel ABŞ biznes nümayəndə heyətinin Azərbaycana səfərinin yekunlarına həsr olunmuş brifinqdə jurnalistlərə bildirib. Xəbəri APA informasiya agentliyi yayıb.
K.Angel "Tramp yolu" ilə əlaqədar bir sıra geosiyasi faktorların olduğunu vurğulayıb:
"Bir tərəfdə Rusiya, digər tərəfdə isə İran bu dəhlizin istifadəyə verilməsini istəmir. Türkiyə isə əksinə, dəhlizin açılmasına dəstək nümayiş etdirir. Ermənistan da bu prosesdə maraqlıdır, çünki marşrutdan keçəcək yüklərdən rüsum toplamaq imkanı onlar üçün üstünlük hesab olunur. Məncə, bu məsələ müəyyən təhlükəsizlik təminatları və diplomatik yanaşma tələb edəcək. Lakin bu, iqtisadi tərəqqidən fərqli bir mövzudur".
Rəsmi Yerevan da bugünlərdə ABŞ təmsilçiləri ilə müzakirələr haqda informasiya veriləcəyiini bildirib.
Bundan əvvəl ABŞ biznes nümayəndə heyətinin Orta Dəhlizə səfərinin Qazaxıstan mərhələsi gerçəkləşib. Onlar Qazaxıstandan Azərbaycana sentyabrın 7-də gəliblər.
- Transxəzər Beynəlxalq Nəqliyyat Marşrutu (Trans-Caspian International Transport Route) və ya Orta Dəhliz (Middle Corridor) - Çin, Qazaxıstan, Xəzər dənizi akvatoriyası, Azərbaycan, Gürcüstan, Türkiyə və Avropa ölkələrindən keçən beynəlxalq nəqliyyat dəhlizidir. Orta dəhliz 2017-ci ildə fəaliyyətə başlayıb.
- Bu il avqustun 8-də Azərbaycan və Ermənistan rəsmiləri bu iki ölkə ( onilliklər boyu münaqişədə olublar) arasında Vaşinqtonda sülh müqaviləsinin mətnini paraflayıblar. Oval ofisdə ABŞ prezidentinin iştirakı ilə tərəflər görüşün nəticələri haqda bəyannamə də imzalayıblar. Bəyannaməyə əsasən, Ermənistanın cənubundan keçməklə Azərbaycanın əsas hissəsi ilə Naxçıvan arasında maneəsiz əlaqə yaranacaq. TRIPP adlanan bu marşrut Ermənistanın suverenliyini, ərazi bütövlüyünü və yurisdiksiyasını qoruyub saxlayacaq.
Bakıda 'Sonsuz qardaşlıq – IV' təlimi keçirilir
Bakıda Azərbaycan, Qazaxıstan, Qətər, Özbəkistan, Pakistan və Türkiyə xüsusi təyinatlılarının iştirakı ilə "Sonsuz qardaşlıq - IV" çoxmillətli birgə təlimi keçirilir.
Bu barədə bu gün, sentyabrın 9-da Azərbaycan Müdafiə Nazirliyi (AMN) məlumat yayıb.
Sentyabrın 9-da Azərbaycan Müdafiə Nazirliyinin rəhbər heyəti təlimin açılış mərasimində iştirak edib.
"Birgə təlimin əsas məqsədinin dost, müttəfiq ölkələrin xüsusi təyinatlı qüvvələri arasında birgə xüsusi əməliyyatların keçirilməsi sayəsində təcrübə mübadiləsinin aparılması, qarşılıqlı fəaliyyətlərin təşkili üzrə bacarıqların təkmilləşdirilməsi, eləcə də zərurət yarandıqda birgə əməliyyatları aparma imkan və bacarıqlarının inkişaf etdirilməsi olduğu diqqətə çatdırılıb", - məlumatda vurğulanıb.
Bundan əvvəl, ötən il sentyabrın 10-da Qazaxıstanın Türküstan vilayətində yerləşən Orda poliqonunda "Sonsuz qardaşlıq – III" çoxmillətli birgə xüsusi təyinatlı qüvvələrinin təlimi keçirilmişdi. Həmin təlimə də sözügedən altı ölkədən xüsusi təyinatlılar qatılmışdı.
Xatırlatma
Azərbaycanda bir sıra müxalif partiyalar isə ölkənin, əsasən, Şimali Atlantika Müqaviləsi Təşkilatı (NATO) ilə əməkdaşlığı gücləndirməsini vacib sayırlar. Hakimiyyət rəsmiləri də NATO ilə əməkdaşlığın vacibliyini inkar etməsələr də, onlar bu qurma üzvlüyün qarşıda məqsəd kimi olmadığını açıqlayıblar.
Müxalif qüvvələrinə görə, bu siyasət Rusiyanı qıcıqlandırmaq istəməmək və gerçək islahatlara hazır olmamaqdan irəli gəlir.
Komitə həbsdə olan Əhməd Məmmədlinin səhhətindən narahatdır
Həbsdə olan ictimai fəal Əhməd Məmmədlinin bir gözündə problem yarandığı bildirilir.
Bu barədə Məmmədlinin Hüquqlarını Müdafiə Komitəsi məlumat yayıb.
Açıqlamaya görə, Ədliyyə Nazirliyi Tibb Baş İdarəsi fəalın vəkili Elçin Sadıqovun tibbi təminatla bağlı müraciətinə cavab verib. Orada vurğulanır ki, mayın 29-da Məmmədlinin saxlandığı təcridxanaya dəvət edilmiş oftalmoloq fəala "xorioretinal distrofiya" (görmənin əhəmiyyətli dərəcədə itirilməsi) diaqnozu qoyaraq ambulator təyinat verib.
Məmmədlinin Hüquqlarını Müdafiə Komitəsi əlavə edir ki, fəal genetik astma xəstəsidir və saxlanan zaman işgəncə nəticəsində əvvəllər əməliyyat edilmiş gözlərindən zərbələr alıb.
"İşgəncədən sonra onun bir gözü tamamilə bulanıq görür. Həmçinin, 3 sentyabr 2025-ci ildə Əhməd Məmmədli barəsində qondarma cinayət işi üzrə məhkəmə iclası təxirə salındı. Bununla da, Əhmədin həbsdə qalmaq müddəti daha da uzanır, bu vəziyyət isə Əhmədin sağlamlığı üçün təhlükəlidir. Həbsxana şəraiti Əhməd Məmmədlinin sağlamlıq vəziyyəti üçün uyğun deyil. Əhmədin ev dustaqlığına buraxılmasını tələb edirik", - komitənin müraciətində deyilir.
Bu müraciətə uyğun rəsmi qurumlardan münasibət almaq mümkün olmayıb.
Ə.Məmmədli mayın 6-da saxlanılıb və sonra barəsində həbs-qətimkan tədbiri seçilib. Amma onun saxlanan zaman işgəncəyə məruz qalması ilə bağlı iddiaları rəsmi qurumlar təsdiqləməyiblər.
O, Cinayət Məcəlləsinin sağlamlığa qəsdən ağır zərər vurma və xuliqanlıq maddələri ilə ittiham olunur.
Özü ittihamı rədd edir, keçmiş siyasi-ictimai və sonra jurnalist fəaliyyətinə görə cəzalandırıldığını deyir.
Xatırlatma
Ə.Məmmədli 2022-ci ildə D-18 Hərəkatının (hərəkat 2023-cü ildə buraxılıb) sədri ikən polisin qanuni tələbinə qəsdən tabe olmama maddəsi ilə 30 sutka inzibati həbs edilmişdi. Ancaq o, həbsini sülhdən danışması, prezident İlham Əliyevi tənqid etməsi ilə izah etmişdi.
Yerli hüquq müdafiəçilərinin hesabatlarına görə, hazırda Azərbaycanda 375 siyasi məhbus var. Hökumət nümayəndələri isə bu tip hesabatları rədd edir və həbs olunanların konkret əməllərə görə məsuliyyətə cəlb olunduqlarını bildirirlər.
Azərbaycanın terrorçuluqda ittiham etdiyi şəxs Rusiyada saxlanıb
Bakı Moskvadan Azərbaycanda terrorçuluq məqsədilə təlim keçmək və digər cinayətlərdə ittiham olunan şəxsin ekstradisiyasını istəyib. Bunu "RİA Novosti" məhkəmə sənədlərinə istinadla yazıb.
Azərbaycan hüquq-mühafizə orqanları həmin şəxsin cinayət məsuliyyətinə cəlb olunması üçün ekstradisiya olunmasını istəyir.
Agentlik yazır ki, Rusiya məhkəməsi bu ekstradisiyaya hər hansı açıq maneə olmadığını bildirib.
Moskva məhkəməsi sözügedən şəxs barəsində həbs-qətimkan tədbirinin seçilməsi məsələsinə baxaraq onu istintaq təcridxanasına göndərib.
Həmin şəxs Azərbaycanda cinayətkar birlik (cinayətkar təşkilat) yaratmaqda və Azərbaycan qanunvericiliyində nəzərdə tutulmayan silahlı birləşmələr və ya qruplar yaratmaqda da ittiham olunur.
ABŞ səfirliyinin müşaviri AZAL təyyarəsinin qəzaya uğradığı yerə gedib
ABŞ səfirliyinin müşaviri Eşli Tauers Azərbaycanın (AZAL) təyyarəsinin ötən il Qazaxıstanda qəzaya uğradığı yeri ziyarət edib.
Bu barədə bu gün, sentyabrın 8-də ABŞ-ın Azərbaycandakı səfirliyi özünün Facebook hesabında məlumat yayıb.
Məlumatda bildirilir ki, bu, ABŞ biznes nümayəndə heyətinin Orta Dəhlizə səfərinin Qazaxıstan mərhələsində gerçəkləşib: "Aktaudan yola düşməzdən əvvəl ABŞ-Azərbaycan Ticarət Palatası (USACC) icraçı direktoru Natiq Baxışov və ABŞ-nin Azərbaycandakı səfirliyinin iqtisadi məsələlər üzrə müşaviri Eşli Tauers AZAL – "Azərbaycan Hava Yolları"na məxsus sərnişin təyyarəsinin qəza yerini ziyarət etdilər. Orada biz bu faciədə həyatını itirən mülki şəxslərin əziz xatirəsini ehtiramla yad etdik. Hadisənin qalıqları hələ də ərazidə səpələnmiş halda qalır və bu mənzərə itirilmiş həyatların kədərli bir xatırladıcısıdır".
Xatırlatma
AZAL təyyarəsi ötən il dekabrın 25-də Bakı-Qroznı aviareysini yerinə yetirərkən qəzaya düşüb, 38 nəfər həlak olub. Azərbaycan rəsmiləri qəzaya görə Rusiyanın məsuliyyət daşıdığını bildiriblər, amma bunun məqsədli törədilmədiyini açıqlayıblar.
Rusiya prezidenti Vladimir Putinin Əliyev ilə telefon danışığında qəzaya görə üzrxahlıq etsə də, baş verənlərə görə ölkəsinin məsuliyyət daşıdığını etiraf etmədiyi açıqlanıb.
Qazaxıstan Nəqliyyat Nazirliyi hələ fevralın əvvəlində bu qəza ilə bağlı təhqiqata dair ilkin hesabatını açıqlayıb. Hesabatda qeyd edilib ki, AZAL təyyarəsi yer səthi ilə toqquşana qədər xarici təsirə məruz qalıb. Eyni zamanda, təyyarənin uçuşdan əvvəl texniki vəziyyəti yaxşı olub.
Azərbaycan və Ermənistanın Vaşinqton razılaşmaları ilə bağlı müzakirələri olub
Sentyabrın 5-də Azərbaycan baş nazirinin müavini Şahin Mustafayev və Ermənistan baş nazirinin müavini Mher Qriqoryanın rəhbərliyi ilə iki ölkənin nümayəndə heyətlərinin bir-birlərinin ərazisinə qarşılıqlı səfərləri olub.
AZƏRTAC-ın xəbərinə görə, Vaşinqton razılaşmalarına uyğun, tərəflər kommunikasiyaların yaradılması sahəsində fəaliyyətlərin sinxronlaşdırılması məqsədilə sərhəd xəttinin müvafiq sahələrinin delimitasiyası, minalardan təmizlənməsi, zəruri infrastrukturun bərpası, tikintisi və onların icra müddətləri ilə bağlı məsələləri müzakirə ediblər.
Habelə, onlar iki ölkə arasında dövlət sərhədinin delimitasiyası və sərhəd təhlükəsizliyi məsələləri üzrə komissiyalarının növbəti görüşünün təşkili ilə bağlı fikir mübadiləsi aparıblar.
Tərəflər təmasları davam etdirmək barədə razılığa gəliblər.
Bu il avqustun 8-də Azərbaycan və Ermənistan rəsmiləri Vaşinqtonda sülh müqaviləsinin mətnini paraflayıblar. Oval ofisdə ABŞ prezidentinin iştirakı ilə tərəflər görüşün nəticələri haqda bəyannamə də imzalayıblar. Bəyannaməyə əsasən, Ermənistanın cənubundan keçməklə Azərbaycanın əsas hissəsi ilə Naxçıvan arasında maneəsiz əlaqə yaranacaq. TRIPP adlanan bu marşrut Ermənistanın suverenliyini, ərazi bütövlüyünü və yurisdiksiyasını qoruyub saxlayacaq.
Sülh sazişində də tərəflər təsdiq ediblər ki, keçmiş SSRİ respublikalarının sərhədləri müvafiq müstəqil dövlətlərin beynəlxalq sərhədlərinə çevrilib və beynəlxalq birlik onları bu şəkildə tanıyıb. Habelə, onlar bir-birinin suverenliyini, ərazi bütövlüyünü, sərhədlərinin toxunulmazlığını və siyasi müstəqilliyini tanıyıblar. Sənəddə gələcəkdə iqtisadiyyat, tranzit, nəqliyyat, ətraf mühit, humanitar və mədəniyyət daxil olmaqla, müxtəlif sahələrdə əməkdaşlığın təsis edilməsi üçün ayrıca razılaşmalar bağlanması da istisna olunmur.
Xatırlatma
Ötən əsrin 80-ci illərində gərginləşən Qarabağ münaqişəsi Azərbaycan və Ermənistan arasında toqquşmalara səbəb olub. 1990-cı illərin əvvəllərində Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində suverenliyini bərpa edib.
Son illər iki ölkə arasında sülh sazişi ilə bağlı müxtəlif formatlarda danışıqlar aparılırdı.
Rusiya AZAL təyyarəsi ilə bağlı ödənən sığortanın məbləğini açıqlayıb
2024-cü il dekabrın 25-də Qazaxıstanın Aktau şəhəri yaxınlığında "Azərbaycan Hava Yolları" (AZAL) aviaşirkətinə məxsus sərnişin təyyarəsinin qəzaya uğraması ilə bağlı sığorta vəsaiti ödənilib.
Bu barədə Rusiya Xarici İşlər Nazirliyinin (XİN) yaydığı açıqlamada bildirilib.
Vurğulanıb ki, Azərbaycan aviaşirkətinə təyyarə üçün tam sığorta dəyəri – 1 milyard 3 milyon rubl (12.34 milyon ABŞ dolları) məbləğində sığorta kompensasiyası ödənilib: "15 Rusiya vətəndaşından 7-si, 38 Azərbaycan vətəndaşından 35-i, Qırğızıstan vətəndaşlarından 3-ü, Qazaxıstan vətəndaşlarından 6-sının hər birinə ödənişlər tam ödənilib. Bu günə kimi təyyarənin xəsarət almış sərnişinlərinə və ölənlərin yaxınlarına ümumilikdə 358.4 milyon rubl (4.4 milyon dollar) sığorta ödənişi edilib".
Azərbaycan XİN təəccüb edir
Azərbaycan Xarici İşlər Nazirliyi (XİN) Rusiya XİN-in açıqlamasını təəccüblə qarşıladığını bildirir.
XİN vurğulayır ki, "sığorta ödənişlərinin Azərbaycanın Rusiya hökumətindən tələb etdiyi kompensasiya ilə eyniləşdirilməsi cəhdləri düzgün deyil".
"...sığorta ödənişlərinin təşkili prosesi artıq 6 aydır həyata keçirilir. Ümumilikdə, bu ödənişlər məhz AZAL-ın sığorta müqaviləsi çərçivəsində, şirkətin təyyarəsini və sərnişinləri sığorta etməsi nəticəsində öhdəliklərə uyğun olaraq təmin edilir", - məlumatda deyilir.
Sığortanı məhz Rusiya şirkətinin ödəməsinə gəldikdə, XİN qeyd edir ki, adətən təyyarələrin sığortası müvafiq beynəlxalq sığorta şirkətləri vasitəsilə həyata keçirilir: "Rusiyanın ərazisində heç bir beynəlxalq sığorta şirkətinin fəaliyyət göstərmədiyini nəzərə alaraq, AZAL təyyarəsinin sığortası Rusiya şirkəti vasitəsilə aparılıb".
Xatırlatma
AZAL təyyarəsi ötən il dekabrın 25-də Bakı-Qroznı aviareysini yerinə yetirərkən qəzaya düşüb, 38 nəfər həlak olub. Azərbaycan rəsmiləri qəzaya görə Rusiyanın məsuliyyət daşıdığını bildiriblər, amma bunun məqsədli törədilmədiyini açıqlayıblar.
Rusiya prezidenti Vladimir Putinin Əliyev ilə telefon danışığında qəzaya görə üzrxahlıq etsə də, baş verənlərə görə ölkəsinin məsuliyyət daşıdığını etiraf etmədiyi açıqlanıb.
Qazaxıstan Nəqliyyat Nazirliyi hələ fevralın əvvəlində bu qəza ilə bağlı təhqiqata dair ilkin hesabatını açıqlayıb. Hesabatda qeyd edilib ki, AZAL təyyarəsi yer səthi ilə toqquşana qədər xarici təsirə məruz qalıb. Eyni zamanda, təyyarənin uçuşdan əvvəl texniki vəziyyəti yaxşı olub.
CPJ MeydanTV jurnalistlərinə əlavə ittihamların verilməsini pisləyir
Nyu-Yorkda yerləşən Jurnalistləri Müdafiə Komitəsi (CPJ) Azərbaycan hakimiyyətinin həbsdə olan MeydanTV jurnalistlərinə əlavə ittihamların verilməsini, bu iş üzrə fotojurnalist Əhməd Muxtarın da saxlanmasını pisləyən bəyanat yayıb.
Qurumun Avropa və Orta Asiya proqramının koordinatoru Gülnoza Səid son maliyyə ittihamlarının bu yaxınlarda uzunmüddətli həbsə məhkum edilmiş "AbzasMedia" jurnalistlərinə verilən ittihamlarla oxşar olduğunu deyir, bunun isə Azərbaycanda müstəqil media təzyiqlərin "görünməmiş" həddə çatmasının göstəricisi sayır.
"Azərbaycan son təzyiq kampaniyası çərçivəsində haqsız yerə həbs edilmiş 20-dən çox jurnalist və media işçisini, o cümlədən son həbs olunan Əhməd Muxtarı azad etməlidir", – G.Səid bildirib.
Avqustun 28-də "MeydanTV işi" üzrə qaçaqmalçılıq ittihamı ilə həbs olunmuş 10 jurnalistə qanunsuz sahibkarlıq, vergidən yayınma kimi əlavə yeddi ittiham da irəli sürülüb. Bu maddələrdə 12 ilədək həbs cəzası nəzərdə tutulub.
"AbzasMedia işi" üzrə yeddi jurnalistə də oxşar ittihamlar verilib. AzadlıqRadiosunun jurnalisti və iqtisadçı Fərid Mehralızadə daxil olmaqla bu iş üzrə təqsirləndirilənlərə 7 il 6 aydan 9 iləcən həbs cəzası kəsilib.
CPJ Ə.Muxtara ittihamları dəqiqləşdirə bilmədiyini yazır. Fotojurnalist ötən ilin dekabrında MeydanTV jurnalistləri tutulanda saxlanıb, xuliqanlıq və polisə müqavimət ittihamıyla 20 sutka həbs olunmuşdu.
2023-cü ildən bəri azı 21 jurnalist və media işçisi qanunsuz maliyyələşmə ittihamları ilə saxlanılıb. Onlar ittihamları rədd edir, araşdırmaçı, tənqidçi peşə fəaliyyətlərinə görə cəzalandırıldıqlarını deyirlər.
Naxçıvanda istirahət mərkəzində platforma uçub, ölənlər var
Naxçıvan Muxtar Respublikasındakı istirahət mərkəzlərinin birində bədbəxt hadisə nəticəsində ölənlərin olduğu bildirilir.
"Naxçıvan xəbərləri" məlumat verir ki, hadisə sentyabrın 4-dən 5-nə keçən gecə baş verib.
Məlumatda hadisənin Şahbuz rayonu ərazisində qeydə alındığı bildirilir.
Vurğulanır ki, istirahət mərkəzlərinin birində gölməçə üzərində olan platformanın aşması nəticəsində iki nəfər ölüb. Hadisə zamanı xəsarət alanlardan birinin isə xəstəxanaya aparılarkən yolda vəfat etdiyi qeyd olunur. Onların bir ailənin üzvləri olduğu bildirilir.
Hadisədən sonra təcili tibbi yardım avtomobili ilə birgə xəstəxanaya yollanan ailə üzvləri isə yolda qəzaya düşüb. Onların arasında da xəsarət alanların olduğu deyilir.
Məsələyə zərərçəkənlərin yaxınılarından, həmin istirahət mərkəzinin məsul şəxslərindən və muxtar respublikanın rəsmi qurumlarından münasibət almaq mümkün olmayıb.
Xatırlatma
Bu, Azərbaycandakı istirahət mərkəzlərində insan ölümü ilə nəticələnən ilk bədbəxt hadisə deyil. Elə bu yaxınlarda Bakıda Mərdəkan qəsəbəsinin ərazisində yerləşən istirahət mərkəzinin birində elektrik vurması üzündən bir nəfərin öldüyü bildirilirdi.
2014-cü il mayın 23-də isə Qobustan rayonundakı istirahət mərkəzlərinin birində müəllim və şagirdlərinin əyləndiyi elektromobil (elektrokar) aşmışdı. Nəticədə maşında olan 10 yaşlı qız vəfat etmişdi.
Cəmiyyətdə tez-tez istirahət mərkəzlərində təhlükəsizlik məsələləri gündəmə gəlsə də, orada baş verən ölüm hallarının ayrıca statistikası açıqlanmayıb.
Hacı Vəliyevin işi məhkəməyə gedir
Fəaliyyətini dayandıran "Gənc Qazilər" İctimai Birliyinin (İB) sədri Hacı Vəliyev barəsində olan cinayət işi ilə bağlı ibtidai istintaqın yekunlaşdığı bildirilir.
Azərbaycanın bir sıra yerli saytlarında yer alan məlumatlara görə, iş baxılması üçün Tovuz rayon Məhkəməsinə göndəriləcək. Amma, hələlik, bu məlumatı rəsmi qurumlardan dəqiqləşdirmək mümkün olmayıb.
H.Vəliyev bu il aprelin 1-də həbs edilib. O, Cinayət Məcəlləsinin 221.3-cü (Silahdan və ya silah qismində istifadə olunan əşyalardan istifadə edilməklə xuliqanlıq...) və 186.1-ci (Özgənin əmlakını qəsdən məhv etmə və ya zədələmə - zərərçəkmiş şəxsə xeyli miqdarda ziyan vurmaqla törədildikdə) maddələri ilə ittiham olunur. Onun bir neçə dəfə həbs müddəti uzadılıb.
H.Vəliyevin həbsindən sonra "Gənc Qazilər" İB-nin fəaliyyətinin dayandırıldığı açıqlanıb. Bu barədə həmin qurum adından yayılan məlumatda qeyd olunub ki, son dövrlər yaranmış bir sıra obyektiv, subyektiv səbəblər, o cümlədən üzvlər arasında əlaqələrin zəifləməsini nəzərə alaraq, təşkilatın fəaliyyəti ilə bağlı geniş müzakirələr aparılıb: "...Birliyin fəaliyyətinin bu mərhələdə dayandırılmasının daha məqsədəuyğun olduğu qənaətinə gəlmişik".
H.Vəliyev sosial şəbəkələrdə tənqid çıxışları ilə də tanınırdı. O, xüsusilə İkinci Qarabağ müharibəsindən sonrakı dövrdə döyüşlərdə sağlamlığını itirmiş hərbçilərin və ya həlak olanların ailələrinin problemlərini ictimailəşdirib.
"Gənc Qazilər" İB 2021-ci ildə "Qarabağ Qaziləri" İB-nin əsasında yaradılmışdı.
H.Vəliyev müharibədə gözlərinin birini itirib. Onun digər gözündə də problem olduğu bildirilir.
