Avqustun 28-də Rusiyanın Kiyevə zərbələri nəticəsində ölənlərin sayı 23-ə çatıb. Bu barədə Kiyev şəhər Hərbi Administrasiyasının rəhbəri Timur Tkaçenko Teleqram hesabında məlumat verib. O bildirib ki, ölənlərdən dördü uşaqdır. 52 nəfərin yaralandığı qeyd olunub.
Ukrayna prezidenti Volodimir Zelenski avqustun 28-də gecə ənənəvi video-müraciətində bu hücumu həm də ABŞ prezidenti Donald Trampa qarşı "Rusiyanın zərbəsi" adlandırıb: "Rusiya indi dünyada sülh istəyən hər kəsə zərbə vurur. Bu, Ukraynaya qarşı zərbədir...Və bu, həm də Rusiyanın prezident Trampa qarşı zərbəsidir".
Zelenski qeyd edib ki, o, gələn həftə Ukrayna üçün təhlükəsizlik zəmanətləri çərçivəsinin açıqlanacağını gözləyir. Avropalı müttəfiqlər atəşkəs olacağı təqdirdə ABŞ-nin də mümkün iştirakı ilə Ukraynanın təhlükəsizliyinin təminatı üçün tədbirlər görəcəyini vəd ediblər.
Bu arada Ağ ev bildirib ki, Tramp Rusiyanın avqustun 27-dən 28-nə keçən gecə Ukrayna paytaxtına endirdiyi zərbələrdən narazıdır.
Ağ evin mətbuat katibi Kerolayn Levitt mətbuat brifinqində deyib: "O, (prezident Donald Tramp) bu xəbərdən məyusdur, həm də buna təəccüblənməyib. Bunlar çox uzun müddətdir müharibə şəraitində olan iki ölkədir".
Kiyevdə AzadlıqRadiosunun ofisi. 28 avqust 2025
28 avqust
AzadlıqRadiosunun Kiyev ofisinə də ziyan dəyib
Rusiyanın son hava zərbəsi AzadlıqRadiosunun (RFE/RL) Kiyev bürosunun ofisinə ziyan vurub. Bəzi otaqların pəncərələri qırılıb, bəzi avadanlıqlar zədələnib. Xəsarət alan yoxdur.
İki raketin birbaşa hədəfə dəyməsi büronun yaxınlığında partlayışlara səbəb olub. Radionun ofisi yaxınlığında yaşayış binalarına zərbə dəyib. Bunu müşahidə kameralarından yayılmış videodan görmək olur.
AzadlıqRadiosunun prezidenti Stiv Kapus deyib: "Ukraynada baş verənlərə şahidlik edənlərə zərər dəyməməlidir. AzadlıqRadiosunun ofisləri ziyan görsə də, heç bir əməkdaşımız xəsarət almayıb. Jurnalistlərimizin vacib işlərinə davam edəcəyindən əmin olun. Bu hücumlarda həlak olanların və yaralananların ailələrini, həmçinin təcili yardım göstərənləri düşünürük".
Yaxınlıqdakı Avropa İttifaqı (Aİ) missiyasının binasına da ziyan dəyib. Aİ Şurasının prezidenti Antonio Koşta zərbəni qınayıb.
+++
Bu, iyulun 31-dən bəri Ukrayna paytaxtına edilən ən böyük hücumdur, həmin vaxt 30-dan çox insan həlak olmuşdu.
Ukrayna prezidenti Volodimir Zelenski bildirib ki, bu hücumlar "həftələrlə və aylarla atəşkəs və real diplomatiya çağırışı edən dünya ictimaiyyətinə açıq cavabdır".
"Rusiya danışıqlar masası əvəzinə ballistik raketləri seçir. Müharibəni bitirmək əvəzinə öldürməyə davam etməyi seçir. Bu isə o deməkdir ki, Rusiya hələ də nəticələrdən çəkinmir. Verilən bütün müddətlər çoxdan pozulub, onlarla diplomatik imkan məhv edilib. Rusiya hər bir hücuma, bu müharibənin hər bir gününə görə məsuliyyət daşımalıdır", - Zelenski X platformasındakı paylaşımında bildirib.